ނަވިނެތަމް ޕިއްލޭގެ ވާހަކަ ހަރުކަށި އިބާރާތުން ކުށްވެރި ކުރަމެވެ

އދގެ ހިއުމަން ރައިޓްސް ހައިކޮމިޝަނަރ ނަވިނެތަމް ޕިއްލޭ ރާއްޖެއަށް ކުރެއްވި ޒިޔާރަތުގައި ދެއްކެވި ވާހަކަތަކުގެ ސަބަބުން ދިވެހިންނަށް ހަގީގަތް އޮޅި، ދީނީ ބައިބައިވުމަކަށް ގޮސްދާނެތީ އަޅުގަނޑު ކަންބޮޑުވުން ފާޅުކުރަމެވެ. އަދި މިފަދަ ފިތުނައަކުން ގައުމު ސަލާމަތް ކުރުމަށްޓަކާ ހައްދު ޖެހުމާ، ޒިނޭ ކުރުން ފަދަ ކަންތައްތަކާ ބެހޭ ގޮތުން އަދި ހާއްސަކޮށް އިސްލާމުދީނުގައި އަންހެން ކަނބަލުންނަށް ދީފައިވާ އިޙްތިރާމާ ގަދަރު ހާމަކޮށްދިނުމަށް ދީނީ ދަންނަ ބޭކަލުންގެ ކޮނޑުގައި އެޅިފައިވާ ޒިންމާ ފުރިހަމައަށް އަދާކުރުމަށް ގޮވާލަމެވެ. އަޅުގަނޑު ދެކޭ ގޮތުގައި ނަވިނެތަމް ޕިއްލޢޭގެ ވާހަކަތަކަކީ އަގީދާގެ ގޮތުން ދިވެހިން ވަރަށް ބޮޑަށް ބަލިކަށިވެފައިވާ ދަނޑިވަޅެއްގައި އިތުރަށް ބަލިކަށި ކުރުމަށް ދީފައިވާ ފިކުރީ ހަމަލާތަކެކެވެ. އަދި ނަވިނެތަމް ޕިއްލޭގެ ވާހަކަތަކުގެ ސަބަބުން ބައެއް ދިވެހިންގެ ހިތުގައި ދީނާ މެދު ސުވާލު އުފެދި ހަގީގަތް އޮޅޭ ގޮތްވަމުންދާކަން ވެސް ފާހަގަ ކުރަމެވެ. ވީމާ މިއީ ދިވެހިންގެ އަގީދާގެ ބަލިކަށިކަން ދެނެގަނެ އަގީދާ ހަރުދަނާ ކުރުމަށް މަސައްކަތް ފަށަންވީ ވަގުތެވެ.

އިސްލާމިކް މިނިސްޓަރުގެ ހައިސިއްޔަތުން ނަވިނެތަމް ޕިއްލޭގެ ވާހަކަތަކަށް ހަމައެކަނި ރައްދު ދިނުމަކީ އިސްލާމިކް މިނިސްޓަރުގެ ޒިންމާ އަދާކުރުމެއް ނޫނެވެ. މިދަނޑިވަޅުގައި ދީނީ ދަންނަ ބޭކަލުންނާ އެކު ރައްޔިތުންނަށް ޖެހިފައިވާ ވަބާއިން ސަލާމަތް ކުރުމަށް މަސައްކަތް ކުރަން ޖެހެއެވެ. އަދި ސަރުކާރުގެ ތެރެއިން މިމަސައްކަތަށް މަގުފަހިކޮށް ދެވެން ޖެހޭނެއެވެ.

ނަވިނެތަމް ޕިއްލޭ މަޖިލިހުގައި ދެއްކި ވާހަކަތައް އަޅުގަނޑު ހަރުކަށި އިބާރާތުން ކުށްވެރި ކުރަމެވެ. އަދި މަޖިލީހުގެ ތެރޭގައި މިފަދަ ވާހަކަތަކެއް ދެކެވުނު އިރު، މަޖިލީހުގެ ބައެއް އިއްޒަތްތެރި ބޭކަލުން އެވާހަކަތައް ކަނުލާ އަޑުއަހަން އެއްވެސް ހަރަކާތެއް ނެތިފައި ތިބި ތިބުމަކީ އެބޭކަލުން ހިންގި ފިނޑި އަމަލެކެވެ. އެބޭކަލުންގެ މިއަމަލު ވެސް ކުށްވެރި ކުރަމެވެ.

އަޅުގަނޑު ގަބޫލު ކުރާ ގޮތުގައި ދިވެހި ފަސްގަނޑުގެ އެއްވެސް ހިސާބެއްގައި އިސްލާމްދީނަށް ހުތުރުވާ ގޮތަށް އަދި ދީނުގެ އަސާސްތަކާ ހިލާފުވާ ގޮތަށް އެއްވެސް ވާހަކައެއް ދެކެވިގެން ނުވާނެއެވެ. މިމައްސަލާގައި ނަވިނެތަމް ޕިއްލޭގެ މަގާމަށާ އޭނާގެ ހައިސިއްޔަތަށް ބެލުމެއް ނެތި އޭނާއާ މެދު ފިޔަވަޅު އަޅަން ޖެހޭނެއެވެ. އެހެން ނޫނީ ދީނަށް ފުރައްސާރަ ކުރުމަކީ އެއްވެސް ޖެހިލުމެއް ނެތި ކުރެވޭ ކަމަކަށް ވެދާނެއެވެ. ވީމާ ނަވިނެތަމް ޕިއްލޭއާ މެދު ފިޔަވަޅު އެޅުމަކީ ތަންފީޒީ އިދާރާތަކުންނާ ސަލާމަތީ ބާރުތަކުގެ މައްޗަށް މިހާލަތުގައި ވާޖިބު ކަމެއް ކަމަށް އަޅުގަނޑު ދެކެމެވެ.

ބުދުތަކުގެ މައްސަލަ ބަލައި ދިނުމަށް އެދި އަޅުގަނޑު ޕްރޮސެކިއުޓާރ ޖެނެރަލްއަށް ހުށަހެޅި މައްސަލައިގެ ޖަވާބު ޕްރޮސެކިއުޓާރ ޖެނެރަލް ދެއްވައިފިއެވެ

މިމަހުގެ ސާދަވަނަ ދުވަހު އަޅުގަނޑު ޕީޖީއަށް ހުށަހެޅި މައްސަލައަށް ޕީޖީ ދެއްވި ޖަވާބު ތިރީގައި މިވަނީއެވެ. 

އިންޑިއާ ސަރުކާރާއި އެކު ރާއްޖެއިން ބާއްވަމުންދާ ގާތްގުޅުމާއި މެދު ދިވެހިންގެ ހިތްތަކުގައި ބިރުވެރިކަން އުފެދެނީ

ނިމިގެން ދިޔަ ސަތާރަވަނަ ސާކް ސަމިޓުގެ ކުރިންވެސް އިންޑިއާއައި ރާއްޖެއާއި ދެމެދު އޮންނަ ގުޅުމަކީ މިސަރަހައްދުގެ އެތައް ބައެއްގެ ލޯތައް އަމާޒުވެފައިވާ ގުޅުމެކެވެ. މިސަރަހައްދުގެ އެހެން ގައުމުތަކާއި އަޅާ ބަލައިރު، ހާއްސަކޮށް ރާއްޖެއިން އިންޑިއާއަށް ދެމުންދިޔަ އިސްކަމަކީ އަވައްޓެރި ގައުމުތައް އިންޑިއާއައި މެދު ހަސަދަވެރިވާން ފަށާފައިވާ ކަމެކެވެ. މިހުރިހާ ކަމެއް އެއް ފަރާތް ކުރުމަށްފަހު ޚާރިޖީ ގުޅުންތަކާއި ބެހޭ ގޮތުން ވިސްނާލަމާތޯއެވެ؟

ހާރިޖީ ސިޔާސަތުތަކަށް ބަލާ އިރު، އެހެން ގުޅުންތަކެކޭ ވެސް އެއްފަދައިން ކޮންމެ ގައުމަކުން ވެސް އަނެއް ގައުމަށް ކަންތައްތައް ކޮށްދެމުން އައިސްފައިވަނީ އެގައުމެއްގެ ފަރާތުން ފައިދާތަކެއް ހާސިލު ކުރުމަށެވެ. އަމުދުން ރާއްޖެ ކަހަލަ ތަނަވަސްކަން ކުޑަ، ގުދުރަތީ ވަސީލަތްތައް މަދު ގައުމަކަށް އެހެން ގައުމުތަކުން އެހީތައް ދެމުންދަނީ ރާއްޖޭގެ ފަރާތުން ލިބެން ހުރި ފައިދާތަކެއް ވެސް ނެތިއެއް ނޫނެވެ. ދުނިޔޭގެ އެހެން ގައުމތަކައި އަޅާ ބަލާއިރު، އިންޑީއާއަކީ ރާއްޖެއަށް އެންމެ ގިނައިން އެހީދޭ އެއްގައުމެވެ. މިރޭހުގައި އިންޑިއާއާ ވާދަ ކުރަމުން އަންނަނީ ޗައިނާއެވެ. މިސަރަހައްދުގެ ގައުމުތަކަށް ބަލާއިރު، ޕާކިސްތާނު، ސްރީލަންކާ، ބަންގްލަދޭޝް، ބޫޓާން ފަދަ ގައުމުތަކަކީ އަސްކަރީ ގޮތުން އަދި އެގައުމުތައް އެހެނިހެން ގޮތް ގޮތުން ކުރި އަރައި ދިޔަ ނަމަވެސް ދުނިޔޭގެ އެހެން ގައުމުތަކަށް މާބޮޑު ބިރުވެރިކަމެއް ހުރި ގައުމުތަކެއް ނޫނެވެ. ނަމަވެސް އިންޑީއާ އަކީ ދުނިޔޭގައި އެންމެ ބާރުގަދަ ކަމަށް ދައުވާ ކުރަމުން އަންނަ ހުޅަނގުގެ ގައުމުތަކުން ވެސް މިހާރު ފަސްޖެހެމުން އަންނަ ގައުމެކެވެ.

ހުޅަނގުގެ ގައުމުތަކުން އިންޑިއާ ދެކެ ބިރު ގަންނަ ފަދައިން އިންޑިއާ ވެސް ހުޅަނގުގެ ގައުމުތައް ދެކެ ބިރުގަންނަ ކަން ފާހަގަކޮށްލެވެއެވެ. މިބިރު ފަހަނަޅައި ދިއުމަށް އިންޑިއައިން ފަށާފައިވާ މަސައްކަތަކީ މުޅި އޭޝިއާ ބައްރުގައި ވެސް އިންޑިއާގެ ސަލާމަތަށް ނުރައްކާ ވެދާ ފަދަ ސަރަހައްދެއް ނުބޭއްވުމެވެ. ކޮންމެވެސް އެއްގޮތަކުން އިންޑިއާގެ މުށުތެރެއަށް އެފަދަ ތަންތަން ގެންދަމުންދާ މަންޒަރު ވަރަށް ސާފުކޮށް ފެންނަމުންދާކަން ފާހަގަކޮށްލެވެއެވެ. މިގެން އެއްވެސް ކަމަކީ ދިވެހިން ކަންބޮޑުވާން ޖެހޭ ކަމެއް ނޫނެވެ. ރާއްޖެ އޮތީ މިސަރަހައްދުގެ ގައުމުތަކައި އެކު ވަރަށް ރަނގަޅު ގުޅުމެއް ގާއިމުކޮށްފައެވެ. އަދި މިސަރަހައްދުގައި ބާރުގަދަ ކުރުމަށް އިންޑިއާއާ އެކު ވާދަ ކުރަމުންދާ ޗައިނާއާ އެކުވެސް ރާއްޖެ ބާއްވަމުން ގެންދާ ގުޅުންތައް ކުޑަ ނޫން ކަން ޗައިނާގެ ހިލޭ އެހީގެ ދަށުން ހުޅުމާލޭގައި އަޅަމުން ގެންދާ އެއްހާސް ފުލެޓަށް ބަލާލުމުން އެކަނިވެސް ހާމަވެގެންދެއެވެ.

މިހުރިހާ ކަމަކަށް ވިސްނާލުމަށްފަހު އިންޑިއާއާ އެކު ރާއްޖެއިން ބާއްވަމުން ގެންދާ ގުޅުމައި މެދު ވިސްނާލަމާތޯއެވެ. އަޅުގަނޑު ދެކޭ ގޮތުގައި ރާއްޖެއަށް އެކަމުގެ ފައިދާ ކުރާހާ ހިނދަކު އެއީ މައްސަލައެއް ނޫނެވެ. ނަމަވެސް ރާއްޖޭގެ މިނިވަންކަމާއި އިސްތިގުލާލާ ކުޅެލާ ރާއްޖެ އަޅުދާސްތުވެދާ މިންވަރަށް އެއްވެސް ގައުމަކާއި ގުޅުން ބޭއްވުމަކީ އަޅުގަނޑު ގަބޫލު ކުރާ ކަމެއް ނޫނެވެ. އުފާވެރި ހަބަރަކީ ރާއްޖޭގެ ޚާރިޖީ ސިޔާސަތަކީ ހުރިހާ ގައުމުތަކާއި ވެސް ގުޅުން ބޭއްވުމެވެ. އެއްވެސް ގައުމަކާއި ދެކޮޅުވެރި ނުވުމެވެ. އަޅުގަނޑު ރާއްޖޭގެ ޚަރިޖީ ސިޔާސތު މިހާރު އޮތް ގޮތަށް ތާއިދު ކުރަމެވެ. ނަމަވެސް ޚާރިޖީ ސިޔާސަތު މިހާރު ޒަމާނާ އެއްގޮތަށް މޮޑިފައި ކުރަން ޖެހިފައިވާ ކަންވެސް ފާހަގަކޮށްލާނަމެވެ. ނޫނެކޭ ބުނަން ޖެހޭ ފަހަރުތަކުގައި ރާއްޖެއަކީ ވެސް ނޫނެކޭ ބުނެވޭ ފެންވަރުގެ ގުޅުމެއް އެހެން ގައުމަތަކައި އެކު ގެންގުޅެން ޖެހޭނެ ކަމަށް އަޅުގަނޑު ގަބޫލު ކުރަމެވެ. އަދި އެގޮތަށް ޚާރިޖީ ސިޔާސަތު ބައްޓަން ކުރުމަށް ވެސް ގޮވާލަމެވެ.

ފަހަކަށް އައިސް އިންޑިއާއިން ރާއްޖެއާ މާގާތް ގުޅުންތަކެއް ބާއްވަމުން ގެންދަނީ އައްޑޫ ސިޓީގެ ގަމުގެ ބޭނުމުގައި ކަމަށް ބައެއް ފަރާތްތަކުން ބުނަމުންދާ ވާހަކައަކީ އަޅުގަނޑު ކަންބޮޑުވާ ކަމެކެވެ. އެއީ ގަމަށް ބާރުފޯރުވުމަކީ މީގެ ކުރިން ވެސް އަސްކަރީ ބޮޑެތި ބާރުތަކުން ބާރުފޯރުވާ، އޭގެ ސަބަބުން މުޅި ދިވެހި ގައުމު އަޅުވެތިކޮށްފައިވާ ކަމެކެވެ. މިއީ ދިވެހި ތާރީޚުގެ ސަފްހާތަކުން ފެންނަން އޮތް ހަގީގަތެކެވެ. ދެވަނަ ބޮޑު ހަނގުރާމައިގެ ދުވަސްވަރު އިނގިރޭސީންގެ ހިމާޔަތުގެ ނަމުގައި ރާއްޖެއަށް އަޅުވެތިކަން ލިބިފައިވާ އެއްސަބަބެވެ.

އައްޑޫ ސިޓީގައި ބަހައްޓާފައިވާ މޮނިއުމެންޓްތަކާއި ގުޅޭ

އައްޑޫ ސިޓީގެ ހިތަދޫގެ ޕަވަރ ޕާރކު ސަރަހައްދުގައި ބުދުދީނުގެ މީހުން އަޅުކަން ކުރަން ގެންގުޅޭ ޒާތުގެ ބުދުތައް ވެސް ހިމެނޭ ގޮތަށް ބަހައްޓާފައިވާ މޮނިއުމެންޓްގެ މައްސަލަ ތަހުގީގު ކުރުމަށް އަޅުގަނޑު ޕްރޮސެކިއުޓާރ ޖެނެރަލަށް ހުށަހަޅައިފީމެވެ.

އަޅުގަނޑު ގަބޫލު ކުރާ ގޮތުގައި، މިއީ ރާއްޖޭގެ ގާނޫނު އަސާސީއާއި އެހެނިހެން ވެސް ބައެއް ގާނޫނުތަކައި ގަވާއިދުތަކާއި ސީދާ ފުށޫ އަރާ ކަމެކެވެ. އަދި މިއީ ސައްތައިން ސައްތަ މިދިވެހި ގައުމުގައި ކުރެވިގެން ވާނެ ކަމެއް ވެސް ނޫނެވެ. މިފުރުސަތުގައި ޕާކިސްތާނު ސަރުކާރައި ދިވެހި ސަރުކާރައި ގުޅިގެން ބަހައްޓާފައިވާ މޮނިއުމެންޓް ވައްޓަލި މައްސަލާގައި ހައްޔަރުކޮށްފައިވާ ދެމީހުންގެ މައްޗަށް ކުރަމުންދާ ތަހުގިގުތައް ހުއްޓާލާ އެދެމީހުން ބަންދުން ދޫކޮށްލުމަށް ވެސް ގޮވާލަމެވެ. އަޅުގަނޑު ގަބޫލު ކުރާ ގޮތުގައި އެ މޮނިއުމެންޓް ވައްޓާލައިގެން އައްޑުގެ ދެދަރިއަކު ހިންގާފައިވާ އެއަމަލަކީ މުޅި ގައުމު އެދެދަރިންނައްޓަކާއި ފަހުރުވެރިވާން ޖެހޭނެ ކަމެކެވެ. އަދި މިކަމުން ވެސް މިގައުމުގައި އިސްލާމީ ވަހުދަތު ދެމެހެއްޓުމަށް ޖިހާދު ކުރަން ޖެހިއްޖެ ހިނދެއްގައި ބޮޑު ތަކުރުފާނަށް ދޫނުކުރާނެ ކިތަންމެ ތަކުރުފާނެއް ރާއްޖޭގައި ތިބިކަން ހާމަ ވެގެންދެއެވެ. މިމައްސަލާގައި ސިޔާސީ ޕާޓީތަކުން ހަމަ ހިމޭނުން ތިބި ތިބުން އަޅުގަނޑު ހަރުކަށި އިބަރާތުން ކުށްވެރި ކުރަމެވެ. އަޅުގަނޑު ގަބޫލު ކުރާ ގޮތުގައި ސިޔާސީ ޕާޓީތަކުން އިސްނަގައިގެން މިމައްސަލާގައި މިއަށް ވުރެ އިތުރަށް މަސައްކަތް ކުރަން ޖެހޭނެއެވެ. 

ތިރީގައި މިވަނީ އަޅުގަނޑު ޕްރޮސެކިއުޓަ ޖެނެރަލްއަށް މައްސަލަ ހުށަހެޅި ސިޓިއެވެ. 

  

`

ބަހާރީވިލާ

ގދ ރަތަފަންދޫ

ޕްރޮސެކިއުޓާރ ޖެނެރަލް އަލްއުސްތާޒު އަހުމަދު މުއިޒަށް

ވެދުން ސަލާމަށްފަހު ދަންނަވަމެވެ.

ސަތާރަވަނަ ސާރކު ސަމިޓާއި ގުޅިގެން އައްޑޫ ސިޓީގެ ހިތަދޫގައި ލިންކު ރޯޑަށް ވާ ގޮތަށް ބަހައްޓާފައިވާ ޕާކިސްތާނުގެ މޮނިއުމެންޓްގައި އެހެނިހެން، ދީންތައް ރަމްޒުކޮށްދޭ ފަދަ ބުދުތަކެއް ހިމެނެއެވެ. އަޅުގަނޑުގެ ސިޓީއައި އެކު އެމޮނިއުމެންޓައި އެމޮނިއުމެންޓްގައި ހިމެނޭ ބައެއް ބުދުތަކުގެ ތަސްވީރުތައް ފޮނުވީމެވެ.

އަޅުގަނޑު ގަބޫލު ކުރާ ގޮތުގައި މިމޮނިއުމެންޓްގައި އިސްލާމްދީން ނޫން އެހެން ދީން ތަކެއް ރަމްޒްކޮށްދޭ އެއްޗެހިތަކެއް ހިމެނޭތީ، އެމޮނިއުމެންޓަކީ ރާއްޖޭގެ ގާނޫނު އަސާސީއާއި، ދީނީ އެއްބައިވަންތަކަން ހިމާޔަތް ކުރުމާއި ބެހޭ ގާނޫނައި ވެސް ހިލާފު އެއްޗެކެވެ. އަދި މަނިކުފާނަކީ ގާނޫނު އަސާސީގެ ދުއިސައްތަ ތޭވީސްވަނަ މާއްދާގެ "ފ"ގެދަށުން ގާނޫނު އަސާސީ ނަގާ ދެމެހެއްޓުމުގެ މަސްއޫލިއްޔަތުވެސް ހަވާލުވެފައިވާ ފަރާތަށްވާތީ، މިފަދަ ލާދީނީ އެއްޗެހިތަކެއް ރާއްޖެއަށް އެތެރެކޮށް، ރާއްޖޭގެ ބިމެއްގައި ބަހައްޓާފައިވާތީ މިމައްސަލަ ބަލައިދިނުމަށް އެދުނީމެވެ.

ގާނޫނު އަސާސީއަށް އަމަލު ކުރުމަކީ ދިވެހި ގާނޫނު އަސާސީގެ ބާރުފޯރާ ހިސާބުގައިވާ ހުރިހާ ފަރާތްތަކަށް ލާޒިމް ކަމަކަށްވާ އިރު، އަޅުގަނޑު ގަބޫލު ކުރާ ގޮތުގައި، މިއަމަލަކީ ގާނޫނު އަސާސީގެ ބާރު ކަނޑުވާލުމަށް ހިންގާފައިވާ އަމަލެކެވެ.   

އިހުތިރާމު ގަބޫލު ކުރެއްވުން އެދެމެވެ.

14 ނޮވެމްބަރު 2011-11-14

ހާދިމުކުމް

މިސްބާހު އައްބާސް(އޭ 299674)