ޑިމޮކްރަސީގެ މައިގަނޑު އެއްއަސާސަކީ މިނިވަން މީޑީއާއެކެވެ. ބުރަ މަސައްކަތްތަކަކުން ވިރާސީ ވެރިކަމެއް ނިންމާލުމަށްފަހު އާ ގާނޫނު އަސާސީއާއި އެކު ދިވެހިން ގެނައި ނިޒާމާއި އެކު މިއަސާސް އޭގެ އެންމެ ފުރިހަމަ ގޮތުގައި ލިބިގެނެއް ނުދެއެވެ. ހިޔާލުފާޅު ކުރުމުގެ މިނިވަންކަމާއި، މީޑީއާގެ މިނިވަންކަންވަނީ ވޭތުވެދިޔަ ތިރީސް އަހަރާއި އަޅާ ބަލާއިރު ވަރަށް ބޮޑަށް މިނިވަންވެފައެވެ. އަދި އެކަމަށް ހުރި ދޮރުތައް ވެސްވަނީ ވަރަށް ބޮޑަށް ހުޅުވިފައެވެ. ނަމަވެސް މީޑީއާގެ މިނިވަންކަން ހޯދާދޭނެ ކަމަށް ބުނެ ވެރިކަމަށް އައި ސަރުކާރުގެ ހަޔާތަށް ތިން އަހަރު ވެގެންދާއިރު ވެސް ހިތާމައައި އެކު ދަންނަވާލަން ޖެހެނީ އެކަން ހާސިލުކޮށްދިނުމަށް ސަރުކާރުން މަސައްކަތް ނުކުރާ ކަމެވެ.
ރާއްޖޭގައި މިހާރު ގާއިމުވެފައި އޮތީ މިނިވަން މީޑީއާއެއް ކަމަށް އަޅުގަނޑު އެއްވެސް ވަރަކަށް ނުދެކެމެވެ. އަދިވެސް މީޑިއާގައި މަސައްކަތް ކުރާ ފަރާތްތަކުން ކުރަމުން ގެންދަނީ އަޅު މަސައްކަތްތަކެކެވެ. މިކަން ރާއްޖޭގެ ނަން މަޝްހޫރު ހުރިހާ މީޑީއާއަކަށް ބަލައިލުމުން ހާމަވާނެއެވެ. ދިވެހި މީޑިއާ އަދިވެސް އޮތީ ވިޔަފާރިވެރިންނާއި ސިޔާސީ ވެރިންނާއި ސަރުކާރުގެ މުށުތެރޭގައި ސަލާމަތް ނުވެވިފައެވެ.
ރާއްޖޭގެ މީޑިއާ މިނިވަން ވެފައި އޮތް ކަމަށް ސިޔާސީ ފަރާތްތަކުން ބުނި ނަމަވެސް ކަމުގެ ހަގީގަތް އޮތީ އެއާއި މުޅިން އިދިކޮޅަށެވެ. ހަގީގަތަކީ މިއަދުވެސް ރާއްޖޭގެ މީޑިއާގައި މަސައްކަތް ކުރާ ފަރާތްތަކުން ކުރަމުން ގެންދަނީ އަޅުވެތި ނޫސްވެރިކަމެކެވެ. މިއަޅުވެތިކަމައި ފިރިއައުނުގެ ޒަމާނުގައި ކުރެވުނު އަޅުވެތިކަމައި ހުންނާނީ އެންމެ ދެތިން ފަރަގެކެވެ. އެއީ ފިރިއައުނުގެ ޒަމާނުގައި އަޅުމަސައްކަތަށް ދާ މީހުން އަނބުރާ ނާދެއެވެ. ނަމަވެސް މާތްﷲގެ އިރާދަފުޅުން ދިވެހި ނޫސްވެރިކަމުގައި މަސައްކަތް ކުރަން ނިކުންނަ މީހާއަށް މަސައްކަތަށްފަހު އޭނާގެ އައިލާ ކައިރިއަށް އަނބުރާ ދެވެއެވެ.
ޑިމޮކްރަޓިކް ވެއްޓެއްގައި މީޑިއާއަކީ ހަތަރުވަނަ ބާރަށްވީ ނަމަވެސް އެއީ ވެރިކަމުގެ އަނެއް ތިން ބާރަށް މާ ރައްކާތެރި ބާރެއް ނޫނެވެ. ވުމާއެކު އެންމެ ޑިމޮކްރަޓިކް ވެށިތަކުގައި ވެސް މީޑީއާއަށް ބޮޑެތި ގޮންޖެހުންތަކާއި ކުރިމަތިލާން ޖެހިފައިވެއެވެ. މިދެންނެވި އުސޫލުން ވޭތުވެ ދިޔަ ކުރުމުއްދަތުގައި ވެރިކަން ހިނގުމުގެ ބާރައި، ޖުޑިޝަރީއާއި، ގާނޫނު ހެދުމުގެ ބާރުން ވެސް ރާއްޖޭގެ މީޑިއާއަށް ބޮޑެތި ގޮންޖެހުންތަކަކާއި ކުރިމަތި ކުރުވާފައި އެބަހުއްޓެވެ. އިއްޒަތްތެރި މެމްބަރުންގެ ކަރާމަތާއި އިއްޒަތް ރައްކާތެރި ކުރުމަށައި، ޖުޑީޝަރީގެ ހައިބަތާއި އިތުބާރު ނެގެހެއްޓުމަށާއި، ވެރިކަން ހިނގާ ބާރުން ކުރާ ކަންކަން ފޮރުވުމުގެ މަގުސަދުގައި ރާއްޖޭގެ ހަބަރުފަތުރާ ވަސީލަތްތަކަށްވަނީ އެކި އެކި ފިއްތުންތައް ކުރިމަތި ކުރުވާފައެވެ.
މީޑިއާގެ މިނިވަންކަން ހޯދާ ނުދެވުމަކީ ޑިމޮކްރަސީއަށް އޭގެ ނުރައްކާތެރިކަން ވަރަށް ބޮޑުކަމެކެވެ. ހާއްސަކޮށް ރާއްޖެ ކަހަލަ ޑިމޮކްރަސީ އޭގެ ޅަފަތުގައިވާ ވެއްޓަކަށް ހުރި ވަރަށް ބޮޑު ގޮންޖެހުމެކެވެ.
މީޑިއާއަށް ފިއްތުންތަކެއް ކުރިމަތިވެފައިވާ ކަން އަޅުގަނޑު ފާހަގަ ކުރަނީ ހިތާމައާއެކުއެވެ. ނަމަވެސް ރާއްޖޭގެ މީޑިއާއޭގެ ޒިންމާ އެންމެ ފުރިހަމަ ގޮތުގައި ނުއުފުލާކަން އަޅުގަނޑު ފާހަގަ ކުރަނީ އެއަށް ވުރެ ބޮޑު ހިތާމައަކައި އެކުއެވެ. ދިވެހި ނޫސްވެރިންނަކީ ވެސް ޒިންމާދާރު ބަޔަކަށް ވާންޖެހޭނެއެވެ. ނޫސްވެރިކަމުގައި ދުކުރެވިފައިވާ ބާރުތަކުގެ ފައިދާ ނާޖައިޒު ގޮތުގައި ނަގައިގެން ނުވާނެއެވެ. އެބާރުގެ ބޭނުން ޒާތީ ހަސަދަ ފިލުވުމަށް ބޭނުން ކޮށްގެން ނުވާނެއެވެ. ނަމަވެސް މިމަންޒަރަކީ ވަރަށް ބޮޑަށް ފެންނަމުންދާ މަންޒަރެކެވެ. އަޅުގަނޑު ދެކޭ ގޮތުގައި ދިވެހި މީޑިއާގެ ޒިންމާދާރުކަން ކުޑަވެފައިވަނީ، މީޑިއާ ޒިންމާދާރު ކުރުވުމަށް އުފައްދާފައިވާ މީޑީއާ ކައުންސިލައި ބްރޯޑްކާސްޓިންގ ކޮމިޝަން އަދި މަޖިލީހުގެ ކަމާއި ބެހޭ ކޮމިޓީތަކާއި އެހެނިހެން މުއައްސަސާތަކުގެ ވެސް ޒިންމާދާރުކަން ކުޑަވުމުގެ ސަބަބުންނެވެ. މީޑިއާ ކައުންސިލައި ބްރޯޑް ކާސްޓިންގ ކޮމިޝަނުގެ ފަރާތުން އެދެވޭ މަސައްކަތްތަކެއް ނުފެނުމުގެ ސަބަބުންނެވެ.
No comments:
Post a Comment