މިލިއުން ލިއުމަށް އަޅުގަނޑަށް މަޖުބޫރުވީ ރާއްޖެއަށް މިއަދު ކުރިމަތިވަމުންދާ ކަންތައްތަކުގެ ސަބަބުން، މުޅި ރާއްޖެ ހަލާކުވެގެން ހިނގައިދާނެ ކަމުގެ ބިރުހީވާތީ ފަރުދީ ހައިސިއްޔަތުން އަޅުގަނޑު އަދާކުރަން ޖެހޭ ޒިންމާ އަދާ ކުރުމުގެ ގޮތުންނެވެ.
އެކަކު އަނެކަކަށް ގޮތް ދޫނުކުރާ ބޯހަރު ބައެއްގެ ސިފަ ދައްކަމުން ދައުލަތުގެ މުއައްސަސާތަކުން އެއްބަޔަކު އަނެއް ބަޔަކަށް ގޮންޖަހަމުންދާ އިރު، ރާއްޖެ ވެއްޓެމުން މިދާ ވަޅުގަނޑު ހީވެސް ނުކުރެވޭހާ ފުނެވެ. ހުރުމަތައި ގަދަރަކީ މިކުޑަ ކުޑަ މުޖުތަމައުގައި އެއްވެސް މީހަކަށް ހައްގު ނޫން އެއްޗަކަށް ހެދުމަށް ޝަރުއީ ދާއިރާއާއި އެހެނިހެން މުއައްސަސާތަކުން ކުރަމުން ގެންދާ ކަންތައްތައް އަޅުގަނޑު ހަރު އަޑުން ކުށްވެރި ކުރަމެވެ. ޝަރުއީ ދާއިރާއަށް ގޮންޖެހުމުގެ ގޮތުން ފުލުހުން ހިންގަމުން ގެންދާ ކަންތައްތަކަކީ ވެސް ވަކި ކުޑަ ކަމެއް ނޫންނެވެ.
ކުރިމިނަލް ކޯޓުގެ ނިންމުންތަކަށް ޖެއްސުން ކުރުމަށް، ފުލުހުންގެ ބަންދުގައި ތިބި މީހުން ދޫކުރަމުންދާ އިރު، އެބަޔަކު ހައްޔަރު ކުރި ކުއްތަކަށް ދެން ވެސް އަރައިގަންނާނެ އެވެ. މިއީ ރައްޔިތުންނަށް ގެއްލުމާއި ހަލާކު ކުރިމަތި ކުރުވާނެ ކަންތައްތަކެކެވެ. އަދި މިއީ މިފަދަ މުއައްސަސާތައް އުފައްދާ އެތަންތަނުން ރައްޔިތުންނަށް ދޭން ޖެހޭ ހިދުމަތްތަކައި ސީދާ ފުށޫ އަރާ، އެތަންތަނުގެ ގާނޫނީ ވާޖިބުތަކާއި ވެސް ހިލާފު ކަންކަމެވެ.
ހުރިހާ ކަމެއްގެ ހައްލަކީ މުޒާހަރާކޮށްގެން ލިބޭނެ އެއްޗެއް ނޫނެވެ. ގޮތް ދޫނުކުރުމާއި ބޯހަރުކަމަކީ އަބަދުވެސް ހަލާކަށް މަގުފަހިކޮށްދޭ ކަންތައްތަކެކެވެ. އޭގެ ބަދަލުގައި މަޝްވަރާ ކުރުމާއި މަޑުމައިތިރިކަމާއި ހިތްތިރިކަމަކީ ކޮންމެ ކަމަކަށް ވެސް ހައްލު ހޯދިދާނެ ގޮތްތަކެކެވެ.
އާބާދީގައި ހަތަރު ލައްކަ ހަމަނުވާ މިކުޑަކުޑަ މުޖުތަމައުގެ ތެރޭގައި ކުށްތައް އިންތިހާއަށް އިތުރުވަމުންދާ ދިއުމަކީ ކަމައި ބެހޭ ފަރާތްތަކުން އަޅަން ޖެހޭ ފިޔަވަޅުތައް އެޅުމުގައި އިހުމާލުވަމުންދާ ކަން ސާފުކޮށް އަންގައިދޭ ކަންތައްތަކެކެވެ. މިއިލްޒާމުން ފުލުހުންނާއި، ކުރިމިނަލު ކޯޓާއި، ޕްރޮސެކިއުޓާ ޖެނެރަލް އަދި އެހެނިހެން ވެސް ކަމާއި ބެހޭ ސަރުކާރުގެ މުއައްސަސާތަކަށް އިސްތިސްނާ ވެވޭނެ ގޮތެއްނެތެވެ.
ޝަރުއީ ދާއިރާ އިސްލާހު ކުރުމަށް ނުކުމެ ރައްޔިތުން ކުރިމަތީގައި ޝަރުއީ ދާއިރާ އިތުރަށް ބަދުނާމުވާ ގޮތަށް މަސައްކަތް ކުރުމަކީ އިސްލާހު ކުރުން ކަމުގައި އަޅުގަނޑު އެއްވެސް ހާލެއްގައި ނުދެކެމެވެ. އޭގެ ސަބަބުން ދުވަހަކަށް ވުރެ ދުވަހެއް ޝަރުއީ ދާއިރާގެ ކަންތައްތައް ގޯސްވަމުން ދިއުމަކީ އެންމެ ގާތުގައި އޮތްގޮތެވެ.
ނަމަވެސް އަޅުގަނޑު ގަބޫލު ކުރާ ގޮތުގައި ޝަރުއީ ދާއިރާއަކީ ވެސް ރައްޔިތުންނަށް އަޑި ނޭގޭ ފަދަ ހޮރަކަށް ވަދެ ފިލާތިބެ ސިއްރުން ކަންތައްތައް ކުރާ ބަޔަކަށް ވެގެންނުވާނެއެވެ. ދައުލަތުގެ މާލިއްޔާއިން ބޮޑު ބައެއް ހަރަދު ކުރާ އިރު، އެމީހުންގެ ކަންތައްތައް ވަރަށް ތިލަކޮށް ރައްޔިތުންނާއި ހަމައަށް ސާފުވެފައި އޮންނަން ޖެހޭނެއެވެ. ޝަރުއީ ދާއިރާގެ ހުރުމަތް ކެނޑޭ ފަދަ ގޮތަކަށް ޒާތީވެ އެއްވެސް ފަނޑިޔާރަކަށް ލިބިފައިވާ ބާރުގެ ބޭނުން ކޮށްގެން ނުވާނެއެވެ. އަދި ތިމާ ތާއިދު ކުރާ ފަރާތަކަށް ނުވަތަ ތިމާގެ ގާތްތިމާގެ މީހުންނަށް ރަނގަޅު ގޮތް ހަދައިދީގެން ވެސް ނުވާނެއެވެ. އެހެން ނޫން ނަމަ ގާނޫނު އަސާސީން އެންމެހާ ރައްޔިތުންނަށް ކަށަވަރުކޮށްދީފައިވާ އަދުލުވެރިކަމައި އެކު ޝަރީއަތް ހިންގުމުގެ ހައްގުން މަހުރޫމުވެގެން ހިންގައިދާނެއެވެ.
ވަރަށް ގާތުން ދިވެހި މުޖުތަމައަށް ނަޒަރު ހިންގާ ބަލައިފި ކޮންމެ މީހަކަށްމެ ދިވެހިން ވެއްޓެމުން މިދާ ފުންވަޅުގަނޑު ވަރަށް ސާފުކޮށް ފެންނާނެއެވެ. އަޅުގަނޑުގެ އިލްތިމާސަކީ، ރައްޔިތުންގެ ހައްގުތައް ހޯދައި ދިނުމަށް އުފައްދާފައިވާ ހުރިހާ މުއައްސަސާއަކުން ވެސް އެންމެ ފުރިހަމައަށް އެބައެއްގެ ޒިންމާ އުފުލުމެވެ. ދިވެހި މުޖުތަމައުއަކީ ދިވެހިންނަށް ރައްކާތެރި އަމާން ތަނަކަށް ހެދުމަކީ ދައުލަތުގެ ކަމާއިބެހޭ ހުރިހާ މުއައްސަސާއެއްގެ މައްޗަށް ވާޖިބު ކަމެކެވެ. ވީ އިރު ދިވެހިން މިހައްގުން މަހުރޫމު ކުރުމަކީ އެމުއައްސަސާތަކުގެ މަގުސަދު ހާސިލު ކުރުމެއް ނޫނެވެ. އެފަދަ މުއައްސަސާތަކަށް ދިވެހިން ނަފުރަތު ކުރެއެވެ. ދިވެހިންނަށް ހެޔޮ ނުވިސްނޭ ކަމަށް އަބަދު ނުދެކޭށެވެ. ތިޔަ ބޭފުޅުންގެ ޒިންމާ އަދާ ނުކުރެވޭ ނަމަ ތިތަންތަނަށް އަރައިގަނެގެން ވެސް އެކަންކަން ކުރުވުމަކީ ދިވެހިން ދަންނަ ގޮތެކެވެ.
No comments:
Post a Comment