`
ފަލަސްތީނަކީ މިނިވަން ދައުލަތަކަށް ހެދުމަށް ސެޕްޓެމްބަރު މަހުގެ ތޭވީސް ވަނަ ދުވަހު އދގެ އާއްމު މަޖިލީހަށް ހުށަހަޅާ މައްސަލައަށް ދިވެހި ސަރުކާރުގެ ފަރާތުން ފުރިހަމަ އެއްބާރުލުން ދިނުމަށް ގޮވާލާ ހުށަހަޅާ ޕެޓިޝަން.
ދިވެހި ރާއްޖޭގެ އިއްޒަތްތެރި ރައީސުލް ޖުމްހޫރިއްޔާ މުހައްމަދު ނަޝީދަށް،
އެނގިވަޑައިގަންނަވާނޭ ފަދައިން މިމަހުގެ ތޭވީސްވަނަ ދުވަހު އދގެ އާއްމު އެސެމްބްލީގައި ފަލަސްތީނަކީ ފުރިހަމަ މިނިވަން ދައުލަތެއްގެ ގޮތުގައި ބަލައިގަތުމުގެ މައްސަލަ ފަލަސްތީނުގެ ރައީސް މަހުމޫދު އައްބާސް ހުށަހަޅުއްވާނެއެވެ. ފަލަސްތީނުގައި އަނިޔާ ލިބެމުންދާ މުސްލިމު އަހުންނާއި އުހުތުންގެ ހައްގުގައި މީގެ ކުރިންވެސް ދިވެހި ސަރުކާރުން އަދި ހާރިޖިއްޔާއިން ފާޅު ކުރަމުން ގެންދާ ޝުއޫރުތަކަކީ އަޅުގަނޑުމެން ނިހާޔަތަށް ޝުކުރު ވެރިވާ އަދި ސަރުކާރައި ހާރިޖިއްޔާއަށް އައްސަރި ބަހާއި ސާބަސް ރައްދު ކުރާ ކަންތައްތަކެކެވެ. ކުރުގޮތަކަށް ދަންނަވަނީ ނަމަ އަޅުގަނޑުމެން އެންމެހާ ދިވެހިން ފަހުރުވެރިވާ ކަންތައްތަކެކެވެ. އިންސާނުންނަކީ އަބަދުވެސް ކުށްކުރެވޭ ބައެކެވެ. ނަމަވެސް ކުރެވުނު ކުށް ތަކުރާރުވުމަކީ ހައްދުފަހަނަޅާ ދިއުމެވެ. ބުއްދިވެރި، ހިކުމަތްތެރިންގެ ގޮތަކީ އެފަދަ ކުށްތައް ތަކުރާރު ވިޔަނުދިނުމެވެ. ޔަހޫދީންނާއި އެކު ސަރުކާރުން ބާއްވަމުން ގެންދާ ގުޅުންތަކަކީ އެންމެހާ ދިވެހިން ނިހާޔަތަށް ކަންބޮޑުވާ ކަންތައްތަކެކެވެ. ދާދި ފަހުން ވިކިލީކްސްއިން ލީކްކޮށްލާފައިވާ ލިއެ ކިއުންތަކުން ސަރުކާރުން އިޒްރާއިލާއެކު ގުޅުން ބަދަހި ކުރާކަން ދޭހަވެގެން ދިޔަ ދިއުމަކީ އެންމެހާ ދިވެހިން ނިހާޔަތަށް ކަންބޮޑުވެ ސަރުކާރައި މެދު ތުހުމަތުގެ އިގިލިތައް ދިއްކުރަމުންދާ މައްސަލައެކެވެ. ސިޔާސީ އިދިކޮޅު ފަރާތްތަކުންނާއި އިޖުތިމާއީ ބައެއް ޖަމިއްޔާތަކާއި އާއްމު ފަރުދުން ދެކޮޅު ހަދަމުންދަނިކޮށް ފާޅުގައި، އިޒްރާއިލާއި އެކު ގުޅުން ބަދަހި ކުރަމަށް ގިނަ މަސައްކަތްތަކެއް ސަރުކާރުން ކުރަމުންދާ ކަމީ ދިވެހިން ނިހާޔަތަށް ހިތާމަ ކުރާކަމެކެވެ. ވަތަން އެދޭ އިއްތިހާދުގެ ތެރެއިން ދިވެހިންގެ ރޫހާއި އެއްގޮތަށް ވެރިކަން ކުރުމަށް އުފެދިގެން އައި ސަރުކާރަށް ދެހާސް ތޭރަވަނަ އަހަރު ތާއިދު ކުރުމަށް ދިވެހިން ޖެހިލުންވަމުންދާ، އެއް ސަބަބެވެ.
އާ ގާނޫނު އަސާސީއާއި އެކު ދިވެހިން ބަލައިގަނެފައިވާ ޑިމޮކްރަސީގެ އެންމެ މުހިއްމު އަސާސަކީ ވެރިކަމުގެ ބާރުތައް ރައްޔިތުންނާއި ހަމައިން ފެށިގެން އައިސް އެބާރުތައް ރައްޔިތުންނާއި ހަމައިން ނިމިގެން ދިއުމެވެ. ސަރުކާރު ހިނގުމަށް ރައްޔިތުން އިންތިހާބު ކުރާ ފަރާތްތަކަކީ އެބާރުތައް އިހުލާސްތެރިކަމާއި އެކު ތަންފީޒު ކުރުމަށް ރައްޔިތުން ބަރޯސާވާ ފަރާތްތަކެވެ. ވީ އިރު ދައުލަތުގެ ބާރުތަކާއި ހަޒާނާއާއި މިކަންކަމަކީ ރައްޔިތުންގެ ހައްގުތަކެކެވެ. މިއުސޫލުން ބަލާއިރު، މަނިކުފާނަކީ ވެސް ރައްޔިތުންގެ ކަންތައްތައް އަމާނާތްތެރިކަމާއި އެކު ކުރިއަށް ގެންދިއުމަށް އައްޔަން ކޮށްފައިވާ ހާދިމެއް ކަމުގައި މިފުރުސަތުގައި އަޅުގަނޑުމެން ފާހަގަކޮށްލަނީ މަނިކުފާނަށް ކުޑައިމީސް ބަހެއް ނުވަތަ މަނިކުފާނުގެ މަގާމުގެ ހައިސިއްޔަތާއި ދަރަޖައަށް އުނިކަމެއް ގެނައުމުގެ އެއްވެސް ނިޔަތެއްގައެއް ނޫނެވެ. ވީ އިރު ރައްޔިތުންނާއި ހަމައިން ފެށިގެން ތަންފީޒު ކުރުމަށް މަނިކުފާނާއި ހަމައަށް ގޮސްފައިވާ ބާރުތަކުގެ ބޭނުން ރައްޔިތުންގެ ވިންދާއި ރައްޔިތުންގެ އެދުމާއި ހިލާފަށް ކުރުމަކީ ރައްޔިތުންނަށް ހިޔާނާތްތެރިވުމެވެ. މިއަހަރުގެ މޭމަހުގެ ބާވީސް ވަނަ ދުވަހު ފަލަސްތީނަކީ މިނިވަން ދައުލަތަކަށް ހެދުމަށް ރާއްޖޭއިން ތާއިދު ކުރާނެ ކަމަށް މުޅި މީޑީއާގައި ހާރިޖީ ވަޒީރު އަހުމަދު ނަސީމު އިއުލާން ކުރެއްވި ކުރެއްވުމަކީ ދިވެހިންގެ ހިތްތަކަށް ހިތްހަމަޖެހުމާއި އުފާވެރިކަން ގެނުވައި ސަރުކާރާއި މެދު ދެކެމުން އައި ގޮތް ވެސް އެތައް ތަނަކުން ބަދަލު ވެގެން ދިޔަ ކަމެކެވެ. އަދި މިސަރުކާރުން ބޭނުންވާ ކަމެއް ނަމަ ކުރެވޭނެކަން ރައްޔިތުންނަށް ހާމަވެގެން ދިޔަ ކަމެއް ވެސް މެއެވެ. އަދި މިއަހަރުގެ މޭމަހުގެ ފަހުކޮޅު ބޭއްވި އދގެ އިންސާނީ ހައްގުތަކާއި ބެހޭ ކައުންސިލްގެ ބައްދަލުވުމުގައި ރާއްޖޭއިން އިސްނަގައިގެން އދއަށް ކަނޑައަޅުއްވާފައި ހުންނަވާ ސަފީރު، އިރުތިޝާމް އާދަމް ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ގޮވާލި ގޮވާލުމަކީ ވެސް ދިވެހިން ސަރުކާރާއި މެދު ދެކެމުން އައި ގޮތް ބަދަލު ކުރުމަށް މެދުވެރިވި ސަބަބެކެވެ.
އަޅުގަނޑުމެންގެ މަގުސަދަކީ ސަރުކާރު ބޭޒާރުކޮށް، ސަރުކާރުގެ އަގުވައްޓާލާ ސިޔާސީ ގޮތުން ފައިދާތަކެއް ހާސިލު ކުރުމެއް ނޫނެވެ. އަޅުގަނޑުމެންގެ މިމަސައްކަތުގައި ސިޔާސީ އެއްވެސް ނުފޫޒެއް، އަދި ސިޔާސީ އެއްވެސް މަގުސަދެއް ވެސް ނުވާކަމަށް ދަންނަވަމެވެ. އަޅުގަނޑުމެންގެ ބޭނުމަކީ، ސަރުކާރުން މީގެ ކުރީގައި ވެސް އިއުލާންކޮށްފައިވާ ގޮތަށް ފަލަސްތީނަކީ މިނިވަން ދައުލަތަކަށް ހެދުމުގައި ރާއްޖޭއިން އިސްނަގައިގެން މުޅިގައުމު ފަހުރުވެރިވާ ފަދަ މަސައްކަތްތަކެއް ސަރުކާރުގެ ފަރާތުން ފެނިގެން ދިއުމެވެ. އަޅުގަނޑުމެންގެ މި ގޮވާލުމަކީ މުޅި ގައުމުގެ އިލްތިމާސެކެވެ. ކޮންމެ ދުވަހަކު އެތައް އަނިޔާތަކެއް ތަހައްމަލު ކުރަމުންދާ މުސްލިމުންތަކެއްގެ ކެކުޅުމެވެ. އިޒްރާއިލުގެ އަނިޔާތަކުގެ ޝިކާރައަކަށް ވެފައިވާ އެތައް ހާސް އާއިލާތަކެއްގެ އެދުމެކެވެ. މުސްލިމުގެ މުގައްދަސް ބިމެއް މިނިވަން ކުރުމަށް އެތައް ސަތޭކަ މުސްލިމުންނެއް ކުރަމުން ގެންދާ މަސައްކަތުގެ އާދޭސްތަކެވެ.
ވީމާ ރާއްޖޭގެ ފަރާތުން ފަލަސްތީނަކީ މިނިވަން ދައުލަތަކަށް ހެދުމަށް ފުރިހަމައަށް ތާއިދުކޮށް، އެންމެހާ ދިވެހިންގެ ވިސްނުމާއި ފިކުރު އދގައި ތަމްސީލުކޮށްދޭނެ ކަމަށް އަޅުގަނޑުމެން ގަބޫލު ކުރަމެވެ.
އަޅުގަނޑުމެންގެ ދުއާއަކީ ދިވެހި ދައުލަތަށާއި، ދިވެހިންނަށް އަދަށް ވުރެ ފަހި މާދަމާއެއް ދެއްކެވުމެވެ. އަދި ދުނިޔޭގެ އެކިކަންކޮޅުތަކުގައި އަނިޔާވެރިންގެ އަތްދަށުވެފައިވާ މުސްލިމުންނަށް ނަސްރުލިބުމެވެ.
އިހުތިރާމު ގަބޫލު ކުރެއްވުން އެދެމެވެ.
ނޯޓު: މިޕެޓިޝަންގައި އަދާލަތު ޕާޓީގެ ރައީށް ޝޭހް އިމްރާނު އަބުދުﷲއާއި، ނައިބް ރައީސް ޑރ މައުރޫފު ހުސައިންގެ އިތުރުން، އިދިކޮޅު އެންމެ ބޮޑު ޕާޓީ ޑީއާރޕީގެ ލީޑަރ އަހުމަދު ތަސްމީނު އަލީއާއި، ޕީޕީއެމްގެ އިސް ބޭފުޅެއް ކަމަށްވާ އަހުމަދު މަހުލޫފު ސޮއި ކުރައްވާފައިވެއެވެ. އަޅުގަނޑުގެ މަސައްކަތަށް ހިތްވަރުދީ މަސައްކަތުގައި ބައިވެރިވި އެންމެހާ ފަރާތްތަކަށް ނިހާޔަތަށް ޝުކުރު ދަންނަވަމެވެ.
