ދެހާސް އައްވަނަ އަހަރުގެ ރިޔާސީ އިންތިހާބު ކާމިޔާބުކޮށް، ނޮވެމްބަރު އެގާރަވީ ދުވަހު ވެރިކަމުގެ ހުވާ ރައީސް މުހައްމަދު ނަޝީދު ކުރެއްވީ، ވަތަން އެދޭ އިއްތިހާދުގެ ހުރިހާ ބައިވެރިންނާއި އެކު ތިރީސް އަހަރުވީ އަނދިރި ކަމެއްގެ ތެރެއިން އަލި ދިމާލަކަށް، ރަނގަޅު މިސްރާބަކަށް ދިވެހި ނައު ގެންދިއުމަށެވެ. ވަތަން އެދޭ އިއްތިހާދުގެ ބައިވެރިންނަށް މިދަތުރު ކުރުމަށް ފަސް އަހަރުގެ މުހުލަތެއް ރައްޔިތުން ދީފައިވީ ނަމަވެސް، ދަތުރުފެށިތާ މާގިނަ ދުވަސްތަކެއް ނުވެ، އިއްތިހާދުގެ ބައިވެރިން ދަތުރު ހުއްޓާލުމަށް ފަހު ހަށިފޮޅާލާ ވަތަން އެދޭ ނަވުން ފައިބަން ފެށިއެވެ. ސަބަބަކަށްވީ ރިޔާސީ އިންތިހާބުގައި ފަންސަވީސް އިންސައްތަ ވޯޓު ކާމިޔާބު ކުރި އެމްޑީޕީ އަމިއްލަ އެދުން އިސްކޮށް ތިމާމެންގެ އެކަނި ނަވެއް ކަމަށް ބުނަން ފެށުމެވެ. އެންމެ ފަހު ވަގުތާއި ޖެހެން ދެން ވެސް ހިފެހެއްޓުމަށް އަދާލަތު ޕާޓީ ކުރަމުން ގެންދިޔަ މަސައްކަތަށް ކުރިމަތިވީ ގޮންޖެހުމަކީ ވެސް މިއެވެ. ސިޔާސީ ގޮތުން ބަލާއިރު، ކޯލިޝަން ހެދުމާއި ކޯލިޝަން ރޫޅާލުމަކީ ކޮންމެ ސިޔާސީ ޕާޓީއަކަށް ވެސް، ލިބިފައިވާ މުތުލަގު ބާރެކެވެ. މިބާރަށް ފާޑު ކިއުމުގެ ހައްގެއް އެއްވެސް ބަޔަކަށް ލިބިފައެއް ނުވެއެވެ. އެއް ގޮތަކުން ބަލާ ނަމަ އެމްޑީޕީން ހިސޯރުކޮށްފައިވާ ކޯލިޝަން ސަރުކާރުން ހިންގަމުން ގެންދާ ކަންތައްތަކުން އަދާލަތު ޕާޓިން ބޯދަމައިގަތީއެވެ. އަދާލަތު ޕާޓީން ސަރުކާރު ކޯލިޝަނުން ވަކިވާނެ ކަމުގެ އިންޒާރު ދެމުން ގެންދާތާ ސަރުކާރަށް ވީހާ ދުވަހެއް ވެއްޖެއެވެ. އެންމެ ފަހުން ސެޕްޓެމްބަރު މަހުގެ ސައްބީސްވަނަ ދުވަހު އަދާލަތު ޕާޓީން ނެގި ފިޔަވަޅަކީ، އަދާލަތު ޕާޓީއަކީ ސިޔާސީ ގޮތުން ބުރަދަނެއް ނެތް، ނިންމުންތައް ނިންމުމަށް ޖެހިލުންވާ، ފިނޑި ޕާޓީއެއް ކަމަށް ދެކެމުން ދިޔަ ގިނަ ބަޔަކަށް ހައިރާންކަން ގެނުވި ކަމަކަށެވެ. އަދާލަތު ޕާޓީގެ މަޝްވަރާ މަޖިލީހުން ނެރެފައިވާ ގަރާރުގައި ފާހަގަކޮށްފައިވާ އަށާވީސް ނުކުތާއަކީ އަދާލަތު ޕާޓީ ކޯލިޝަނުން ވަކިވުމަށް ހައްގު ކަންތައްތަކެއް ކަމަށް އެޕާޓީގެ މަޝްވަރާ މަޖިލީހުގެ ބައްތިރީސް މެމްބަރަކުވަނީ އެއްބަސްވެލައްވާފައެވެ. ޕާޓީގެ ކުރިމަގު ބިނާ ކުރާނީ ވެސް އަދި ޕާޓީގެ ކަންތައްތައް ނިންމާނީ ވެސް ޕާޓީގެ މެމްބަރުންނާއި ބާރުތައް ތަންފީޒު ކުރާ ގުނަވަންތަކުންނެވެ. މިނިންމުންތަކަކީ ޕާޓީގެ މެމްބަރުންގެ އެދުމާއި އެއްގޮތް ނިންމުންތަކަށް ވާން ޖެހޭނެއެވެ.
ރާއްޖެ މިއަދު ދެކެމުން މިދާ ހުރިހާ ހިއްޗެއްގެ ވެސް އަސްލަކީ ޒިންމާދާރު އިދިކޮޅު ޕާޓީއެއް ނެތުމެވެ. އަދާލަތު ޕާޓީން ސައްބީސް ސެޕްޓެމްބަރުގައި ސިޔާސީ ހަރުފަތުގައި ކުރިއަށް އަޅާފައިވާ ފިޔަވަޅު މަތީގައި ދެމިތިބޭނެ ކަމަށް އުންމީދު ކުރަމެވެ. އަދި ކޯލިޝަންގައި އޮވެ ސަރުކާރު ޒިންމާދާރު ކުރުމަށް މަސައްކަތް ކުރިވަރަށް ވުރެ އިތުރަށް ކުރިއަށް އޮތްތަނުގައި ކުރާނެ ކަމަށް އުންމީދު ކުރަމެވެ.
ތިރީގައި މިވާ ލިންކުން އަދާލަތު ޕާޓީގެ މަޝްވަރާ މަޖިލީހުން ނެރެފައިވާ ގަރާރު ފެނިލައްވާނެއެވެ.
http://adhaalath.org.mv/?p=2817
No comments:
Post a Comment