އެމެރިކާ ބިރުން ތުރު ތުރު އަޅަނީ

       އދއަކީ، އެމެރިކާ އިސްވެ އޮވެ އުފައްދާފައިވާ ލީގު އޮފް ނޭޝަންސް ނުވަތަ ގައުމުތަކުގެ އިއްތިހާދު، ދެވަނަ ބޮޑު ހަނގުރާމައަށް ފަހު އުވި ދިއުމާއި ގުޅިގެން، ދުނިޔޭގެ ގައުމުތަކަށް ބާރު ފޯރުވުމަށް އަނެއްކާވެސް އެމެރިކާ އިސްވެ އޮވެ އުފައްދާފައިވާ ބައިނަލް އަގުވާމީ ޖަމިއްޔާއެކެވެ. މިނިވަންކަމާއި ޑިމޮކްރަސީ މުޅި ދުނިޔޭގައި ފެތުރުމުގެ ނަމުގައި، ގައުމުތައް ސުންނާފަތިކޮށް އަޅުވެތި ކުރުމަކީ އެމެރިކާއިން އެންމެ ބޮޑަށް ބާރު އަޅާ އެއްކަމެވެ. އެމެރިކާގެ މިވިސްނުމުގެ އެންމެ ބޮޑު ބޭނުމަކީ އެމެރިކާއަށް ވުރެ ތަރައްގީއާއި ތަމަންދުންގެ ރޮނގުން ހަމަ އެއްމެ ގައުމަކަށް ވެސް ކުރިއަށް އެރިޔަ ނުދިނުމެވެ. އެމެރިކާ ނޫން އެހެން އެއްވެސް ގައުމެއް، އަސްކަރީ ގޮތުންނާއި، އެހެން ގޮތަކުން ވެސް ކުރި އަރަން ފަށައިފި ނަމަ އެމެރިކާގެ ފުރިހަމަ ބާރުގެ ދަށުގައިވާ މިދެންނެވި ގޮނޑިކޮއްކޮ އދގެ ބޭނުން ކޮށްގެން އެގައުމަކާއި މެދު ފިޔަވަޅު އަޅާ، އެގައުމެއް ބަލިކަށި ކޮށްލުމަށް ބޭނުން ކުރެއެވެ. ދުނިޔޭގެ ގައުމުތަކަށް ހަންފެތުރުމަށް އެމެރިކާއިން ފެށި އަނެއް މަސައްކަތަކީ، އދގެ ބައިތަކެއްގެ ގޮތުގައި، އެމެރިކާގެ އިތުރުން އެޖެންސީތަކެއް އުފެއްދުމެވެ. އަޅުގަނޑުމެންނަށް ރާއްޖެއިން ވެސް ފެންނަމުން މިދާ، ޑަބްލިއު އެޗް އޯއާއި، ޑަބްލިއު އެފް ޕީއާއި، ޔުނިސެފް އަދި އިންޓަނޭޝަނަލް ކޯޓް އޮފް ޖަސްޓިސްއަކީ މިދެންނެވި އެމެރިކާގެ އެޖެންސީތަކެވެ. އދގެ މިގުނަވަންތަކަކީ ވެސް އެމެރިކާގެ ސިޔާސަތުތައް ޕްރޮމޯޓުކޮށް އެކަންކަން ތަންފީޒު ކުރާ ތަންތަނެވެ. އަދި އެމެރިކާގެ ސިޔާސަތުތަކާއި ދެކޮޅު ހަދާ ގައުމުތަކައި ވެރިންނާއި ވަކިވަކި މީހުންނާއި މެދު އެމެރިކާއިން ފިޔަވަޅު އަޅަން ބޭނުން ކުރާ ތަންތަނެވެ. އަޅުގަނޑުގެ ބަސް ގަބޫލު ނުކުރެއްވިއަސް އެންމެ ރަނގަޅެވެ. ނަމަވެސް ފާއިތުވި މާޒީގައި އެމެރިކާއިން ހިނގާފާއިވާ ޖަރީމާތަކާއި، އެމެރިކާގެ ބައިވެރިން ހިނގަމުންދާ ޖަރީމާތަކަށް ވިސްނާލައްވާށެވެ. ދުނިޔޭގެ ބޮޑެތި ކުށްވެރިން ހާޒިރުކޮށް، ފިޔަވަޅު އެޅުމުގެ ބާރު ލިބިފައިވާ އިންޓަނޭޝަނަލް ކޯޓު އޮފް ޖަސްޓިސްއިން ފަސްދޮޅަސް ތިން އަހަރު މެދުކެނޑުމެއް ނެތި ފަލަސްތީނަށް އަނިޔާ ކުރަމުންދާ އިރު، އިޒްރާއިލާއި މެދު އެޅުނު ފިޔަވަޅެއް އެބައޮތްތޯއެވެ. ރަނގަޅަށް ވިސްނާލައްވާށެވެ. މިދެންނެވި އދއަކީ ދުނިޔޭގެ ގައުމުތައް އެމެރިކާގެ މުށުތެރެއަށް ލުމަށް ބޭނުން ކުރަމުން ދިޔަ، ވަސީލަތެއްކަން އެއީ އެންމެން ވެސް ދަންނަ ހަގީގަތެކެވެ. ދެވަނަ ބޮޑު ހަނގުރާމަ ނިމި ނަވާރަސަތޭކައިގެ އަހަރުތައް ދެބައި އުމުރަށް ދިޔަ އިރު، އެމެރިކާއަށް މިދެންނެވި މަގުސަދު އދ މެދުވެރިކޮށް ވަރަށް ރަނގަޅަށް ހިފެމުން ދިޔައެވެ. ނަމަވެސް އެމެރިކާއަށް ދެން ފެންނަން ފެށީ މުޅިން އެހެން ބިރުވެރި ހުވަފެނެކެވެ. އެއީ ފުރަތަމަ ހަނގުރާމައިގެ ދުވަސްވަރު، ފުނޑުފުނޑުކޮށް ވިއްސި ވިހާލިކޮށްލާފައިވާ މުސްލިމުން، ބާރުގަދަވެ މަޑުމަޑުން މުޅި ދުނިޔެ ކޮންޓްރޯލް ކުރަން ފެށި މަންޒަރެވެ. އެހާ ހިސާބުން އެމެރިކާއާއި ބައިވެރިންގެ ސިއްރު ބައްދަލުވުންތަކަށްފަހު، އދއަކީ މުސްލިމުންނާއި ދެކޮޅަށް ހަނގުރާމަ ކުރާ ތަނަކަށް ވެސް ހެދީއެވެ. މުސްލިމު ގައުމުތަކަށް އަރައިގަތުމަށް އެމެރިކާއަށް ދިމާވި އެންމެ ބޮޑު ގޮންޖެހުމަކީ މުސްލިމު ގައުމުތަކުގެ ގުޅުން ބަދަހި ކަމާއި އަމިއްލަ ފުއްދުންތެރިކަމެވެ. އެމެރިކާގެ މަގުސަދު ހާސިލު ކުރުމަށް ފެށި ފުރަތަމަ މަސައްކަތަކީ، މުސްލިމުން ބައިބައި ކުރުވުމެވެ. އެމެރިކާގެ ސިއްރު އެޖެންޑާގެ ދަށުން މުސްލިމުން އެއްބަޔަކު އަނެއް ބައެއްގެ މައްޗަށްވާ ހަސަދަވެރިން ކަމަށް ހެދިއެވެ. ގައުމުތަކުގެ އިތުރަށް މުސްލިމުން ބާރު ގަދަ ކުރުމަށް އުފެދިފައިތިބި މުސްލިމުންގެ ޖަމިއްޔާތައް ވީ އެމެރިކާއަށް ކުރިމަތިވި ސިންގާތަކެއް ފަދަ އެއްޗެހިތަކަކަށެވެ. ފަލަސްތީނައި އަފްޣާނިސްތާނުގެ ސަހަރާތަކަށް މަސްތުވާތަކެއްޗާއި ޑްރަގު ގެންދިޔަ އެންމެ ފުރަތަމަ ބަޔަކީ ވެސް އެމެރިކާގެ މީހުންނެވެ. އަދި މިދެންނެވި ތަކެތި އެތަނުގައި އާލާކޮށް އޭގެ ވިޔަފާރި ކުރާ ކަމުގެ ތުހުމަތު މުސްލިމުންގެ ބޮލުގައި އަޅުވަން ފެށީ ވެސް އެމެރިކާއިންނެވެ.  މަސްތުވާތަކެތީގެ ޝިކާރައަކަށް މުސްލިމު ޒުވާނުން ހަދަން ކުރި މަސައްކަތުން އަދިވެސް މާބޮޑު ކާމިޔާބީއެއް އެމެރިކާއަށް ލިބިފައެއް ނުވުމަކީ އެމެރިކާ ހިތާމަ ކުރާ ކަމެކެވެ.

     ނަމަވެސް މަންޒަރު މުޅިން ބަދަލުވެ، އެމެރިކާގެ މިދެންނެވި، މަގުސަދުތައް ހާސިލު ކުރުމަށް އުފައްދާފައިވާ އދގެ މުޅި ކުޅިގަނޑު ބަދަލުވާން ފަށައިފިއެވެ. ކުރިން އެމެރިކާ ކުރާ ކޮންމެ ކަމަކަށް އާންބަސް ބުނަމުން ދިޔަ ބައެއް ގައުމުތައް، މަޑުމަޑުން އެމެރިކާގެ ނިންމުންތަކާއި ދެކޮޅު ހަދަން ފަށައިފިއެވެ. އެމެރިކާ ކުރަމުން ގެންދިޔަ ކޮންމެ ކަމަކަށް ކުރިން އާންބަސް ބުނަމުން ގެންދިޔައީ އެގައުމުތަކަށް ވެސް ކުރެވޭނެ މާބޮޑު ކަމެއް ނެތުމުންނެވެ. އެމެރިކާގެ އެކުވެރިން މަޑުމަޑުން ރުޅިވާން ފަށައިފިއެވެ. މިއަދު އެމެރިކާއަށް އޮތް އެންމެ ބޮޑު ބާރަކީ، އަދި ހިތްހަމަ ޖެހުމަކީ އދގެ ސަލާމަތާއި ބެހޭ މަޖިލީހުގައި ކަންކަން ވީޓޯ ކުރުމުގެ ބާރު އެގައުމަށް އޮތް ކަމެވެ. އދގައި ސަތޭކަ ނުވަދިހަ ތިން މެމްބަރުން ތިބި އިރު، އެމެރިކާގެ ބާރު ފޯރުވޭ ގައުމުތައް މަދުވެ، އެމެރިކާގެ ސިޔާސަތުތައް ތަންފީޒު ކުރަން އުފައްދާފައިވާ އދގެ ބާރު އެމެރިކާ އަތުން މަޑުމަޑުން ބީވާން ފަށާފައިވާ ކަމަށް އެމެރިކާއަށް ދަނީ އިހުސާސް ކުރެވެމުންނެވެ.